ធនាគារជាតិកម្ពុជា និងចិន ចុះ MoU ចំនួន២ ដើម្បីជំរុញនវានុវត្តន៍ក្នុងវិស័យធនាគារ និងប្រព័ន្ធទូទាត់សងប្រាក់
ភ្នំពេញ៖ ធនាគារជាតិកម្ពុជា និងធនាគារកណ្តាលចិន នាថ្ងៃទី២១ ខែវិច្ឆិកា ឆ្នាំ២០២៣ នៅទីក្រុងប៉េកាំង បានចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការនវានុវត្តន៍ហិរញ្ញវត្ថុនិងប្រព័ន្ធទូទាត់សងប្រាក់ និងកិច្ចសម្របសម្រួលក្នុងការទូទាត់ និងផាត់ទាត់នៅកម្ពុជា រវាងធនាគារជាតិនៃកម្ពុជា និងធនាគារកណ្តាលចិន។
ទេសាភិបាល ធនាគារកណ្តាលចិន លោក Pan Gongsheng និងលោកស្រី ជា សិរី ទេសាភិបាល ធនាគារជាតិនៃកម្ពុជា បានអញ្ជើញ ចូលរួមជាអធិបតីក្នុងពិធីនេះ និងបានអញ្ជើញចុះហត្ថលេខាលើអនុស្សរណៈទាំងពីរ។
ភាគីទាំងពីរបានចុះ MOU ចំនួន២ គឺអនុស្សរណៈទី១ ផ្ដោតលើកិច្ចសហប្រតិបត្តិការនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់ ដើម្បីលើកកម្ពស់សុវត្ថិភាព និងប្រសិទ្ធភាពប្រតិបត្តិការទូទាត់ឆ្លងដែនរវាងព្រះរាជាណាចក្រកម្ពុជានិង សាធារណរដ្ឋប្រជាមានិតចិន និងជំរុញនវានុវត្តន៍ និងវិសាលភាពបច្ចេកវិទ្យាហិរញ្ញវត្ថុក្នុងវិស័យធនាគារ និងហិរញ្ញវត្ថុឱ្យកាន់តែទូលំទូលាយ។
កិច្ចសហប្រតិបត្តិការក្នុងក្របខណ្ឌនេះនឹងជួយបង្កើនទំនុកចិត្ត សុវត្ថិភាព ប្រសិទ្ធភាព ស្ថិរភាព និងបរិយាបន្តបន្ថែមទៀត ព្រមទាំងគាំទ្រគោលនយោបាយដែលរាជរដ្ឋាភិបាល កម្ពុជាបានដាក់ចេញ ដើម្បីអភិវឌ្ឍសេដ្ឋកិច្ច និងសង្គមឌីជីថល។ សម្រាប់អនុស្សរណៈទី ២ ផ្តោតទៅលើការបង្កើតកិច្ចសម្របសម្រួលក្នុងការទូទាត់ និងផាត់ទាត់នៅកម្ពុជា។
ភាគីទាំងពីរបានឯកភាពគ្នាបង្កើនកិច្ចសម្របសម្រួល និងកិច្ចសហប្រតិបត្តិការ ដើម្បីពង្រឹងសមត្ថភាព នៃវិស័យធនាគារនៅកម្ពុជា សំដៅជួយសម្រួលពាណិជ្ជកម្ម វិនិយោគ និងលំហូរហិរញ្ញវត្ថុរវាងប្រទេស ទាំងពីរដែលកំពុងកើនឡើងជាលំដាប់ឱ្យកាន់តែរលូនជាងមុនបន្ថែមទៀត។
ក្របខណ្ឌកិច្ចសហប្រតិបត្តិការ នេះក៏នឹងចូលរួមចំណែកក្នុងការពង្រឹងសមត្ថភាពប្រកួតប្រជែង និងបង្កើនសក្តានុពលរបស់កម្ពុជាឱ្យ ក្លាយជាគោលដៅវិនិយោគដ៏គួរឱ្យទាក់ទាញ តាមរយៈផលិតផល និងសេវាកម្មហិរញ្ញវត្ថុថ្មីៗ ដែលគ្រឹះស្ថានធនាគារនៅកម្ពុជានឹងផ្តល់ជូនដល់វិនិយោគិនចិន៕